फसव्या कर्जमुक्तीचा शासनाने फेरविचार करावा. - शेतकरी संघटना

0 0 संपादक धनराज भारती शुक्रवार, मार्च ०६, २०२६ Edit this post

किनवट ता.प्र.आज अर्थसंकल्पीय अधिवेशनात सरकारने घोषित केलेल्या कर्जमुक्ती योजनेने शेतकऱ्यांच्या तोंडाला पाने पुसली आहेत. महाराष्ट्रातील शेतकरी आज मोठ्या प्रमाणावर आत्महत्येच्या सावटात महाराष्ट्र आला आहे. शेतकऱ्यांच्या डोक्यावर साडेसात लाख कोटी रुपयांचे कर्ज असताना केवळ वीस हजार कोटी रुपयांची तरतूद करून या शासनाने शेतकऱ्यांची फसवणूक केली आहे. नियमित कर्ज भरणाऱ्या शेतकऱ्यांना त्यांनी भरलेली संपूर्ण रक्कम व 50 हजार रुपयांचे प्रोत्साहन अनुदान तात्काळ त्यांच्या खात्यात जमा करावे. अत्यंत हलाखीच्या परिस्थितीतही त्यांनी हे पैसे भरलेत याचा अर्थ शेतकरी हा इमानदार आहे याचे हे प्रतीक आहे.कोणताही भेद न करता, विना अट संपूर्ण कर्जमुक्ती करून शासनाने दिलेला शब्द पाळावा. शेतकरी कोणताही असो आणि शेतीसाठी घेतलेले कोणत्याही प्रकारचे कर्ज असो ते संपूर्ण माफ झाले पाहिजे. कारण शेती या व्यवसायात सरकारने केलेल्या लुटीचा हा परिणाम आहे.

शेतीमाल स्वस्तात लुटणे आणि कारखानदारी जगवणे या धोरणामुळे शेतकरी कर्जबाजारी झाला आहे, हे सरकारचे पाप आहे. शेतकरी तर मोठ्या प्रमाणावर हिंदूच आहेत व स्वतःला हिंदुत्ववादी म्हणून घेणारं सरकार आहे, मग संपूर्ण कर्जमुक्ती करायला काय अडचण आहे? धर्माच्या आडून शेतकऱ्यांना फसवणे हे आता शक्य होणार नाही. फोडा आणि झोडा नितीचा अवलंब शेतकरी खपवून घेणार नाही.शेतीचा विकास हे गोंडस कारण लावून शासनाने ’कृषी पायाभूत सुविधा निधी योजना’ (एग्रीकल्चरल इन्फ्रास्ट्रक्चर फंड) नावाने योजना निर्माण करून यात लाखो कोटी रुपयाची तरतूद केली असून कोणत्याही सामान्य शेतकऱ्यांना त्या योजनेचा लाभ न देता संबंधित बँका व मोठमोठ्या कंपन्यांनी हा पैसा लाटला आहे. समृद्धी सारख्या योजना कुचकामी आहेत, प्रसंगी अशा योजना थांबवून हा पैसा कर्जमाफीसाठी वळता करावा. प्रभू रामचंद्रांना मानणाऱ्या सरकारने रघुकुल वचन स्मरावे व निवडणुकीत संपूर्ण कर्जमुक्तीचे दिलेले आश्वासन पाळावे. अन्यथा येणाऱ्या निवडणुकी मध्ये शेतकरी सरकारला जागा दाखवून दिल्याशिवाय राहणार नाही. असे यावेळी झालेल्या पत्रकार परिषदेत शरद जोशी प्रणित शेतकरी संघटनेचे जिल्हाध्यक्ष रमेश कदम पाटील म्हणाले.