मराठवाडा साहित्य परिषदेच्या वतीने पैठण येथे पहिले मराठवाडा बालकुमार साहित्य संमेलन आयोजित करण्यात आले आहे. या संमेलनाच्या अध्यक्षपदी ज्येष्ठ बालसाहित्यकार डॉ. सुरेश सावंत यांची एकमताने निवड करण्यात आली आहे. म. सा. प. चे अध्यक्ष कौतिकराव ठाले पाटील यांनी संभाजीनगर येथे पत्रकार परिषदेत ही घोषणा केली.
डॉ. सावंत यांची बालसाहित्याची ३० पुस्तके प्रकाशित असून त्यांनी शालेय विद्यार्थ्यांच्या लेखनाला बालसाहित्याच्या मुख्य प्रवाहात प्रतिष्ठा मिळवून दिली आहे. अलीकडेच त्यांना अ. भा. मराठी बालकुमार साहित्य संस्थेचा जीवनगौरव पुरस्कार मिळाला आहे.
बालसाहित्य आणि बालशिक्षण हे दोन्ही डॉ. सावंत यांचे आस्थाविषय आहेत. 'वाचनसंस्कृती लेखनसंस्कृती', 'बालसाहित्य आणि बालशिक्षणाचा अनुबंध' आणि 'आजची मराठी बालकविता' ही ३ संशोधनपर पुस्तके लिहून त्यांनी बालसाहित्याच्या अलक्षित प्रांताकडे साहित्यविश्वाचे लक्ष वेधले आहे.
डॉ. सावंत यांची कथा, कविता, कादंबरी, चरित्र, बालसाहित्य आणि संपादन इ. वाङ्मयप्रकारांतील एकूण ५४ पुस्तके प्रकाशित झाली असून शालेय आणि विद्यापीठीय अभ्यासक्रमात त्यांच्या काही कविता व लेख समाविष्ट झाले आहेत.
'डॉ. सुरेश सावंत यांच्या बालकवितेचा चिकित्सक अभ्यास' ह्या विषयावर प्रबंधिका लिहून एका विद्यार्थ्याने एम. फिल. ही पदवी प्राप्त केली आहे.
डॉ. सावंत यांना राष्ट्रपती पुरस्कारासह प्रतिष्ठित साहित्य संस्थांच्या ३० पुरस्कारांनी सन्मानित करण्यात आले आहे. डॉ. सावंत यांना तीन वेळा महाराष्ट्र शासनाचे उत्कृष्ट वाङ्मयनिर्मितीचे पुरस्कार मिळाले आहेत. साहित्य क्षेत्रातील योगदानाबद्दल डॉ. सावंत यांना नांदेड जिल्हा परिषदेचा नरहर कुरुंदकर पुरस्कार (जीवनगौरव) प्राप्त झाला आहे.
डॉ. सावंत यांनी शैक्षणिक, सामाजिक, सांस्कृतिक आणि साहित्य क्षेत्रात महत्त्वपूर्ण योगदान दिले आहे. अनेक साहित्य संमेलने, चर्चासत्रे, परिसंवाद, कार्यशाळा, पुस्तक प्रकाशन समारंभांत सक्रिय सहभाग नोंदविला आहे. डॉ. सावंत यांनी शंभरावर पुस्तकांना प्रस्तावना लिहिल्या आहेत, पुस्तकांची पाठराखण केली आहे.
२००२मध्ये कुंटूर येथे झालेल्या आणि २०१९मध्ये जळगाव येथे झालेल्या बालकुमार साहित्य संमेलनाचे अध्यक्षपद त्यांनी भूषविले आहे.
आचार्य विनोबा भावेप्रणीत सर्वोदय आश्रम ह्या संस्थेतर्फे डॉ. सावंत यांना 'आचार्य' उपाधीने सन्मानित करण्यात आले आहे. शिक्षणतज्ज्ञ असा त्यांचा लौकिक आहे.
दि. १२ जानेवारी २०२४ रोजी पैठण येथे होणाऱ्या या संमेलनाचे यजमानपद विशाल बहुद्देशीय प्रतिष्ठान या संस्थेने स्वीकारले आहे. या संमेलनाच्या अध्यक्षपदी निवड झाल्याबद्दल मराठवाडा साहित्य परिषदेचे अध्यक्ष कौतिकराव ठाले पाटील, कार्यवाह डॉ. दादा गोरे, उपाध्यक्ष डॉ. किरण सगर, कोषाध्यक्ष कुंडलिक अतकरे आणि विशाल बहुद्देशीय प्रतिष्ठानचे अध्यक्ष संतोष तांबे यांनी डॉ. सुरेश सावंत यांचे अभिनंदन केले आहे.
addComments
टिप्पणी पोस्ट करा