नांदेड येथील बेला नगर भागातील साई किराणा समोरील गल्लीत नागरिकांना भीषण समस्यांचा सामना करावा लागत आहे. मुख्य रस्त्याच्या शेजारी असलेल्या १० फुटाच्या रोड साईडची नाली पूर्णपणे फुटल्यामुळे गलिच्छ पाणी थेट मुख्य रस्त्यावर येत आहे. महापालिका प्रशासनाकडे वारंवार तक्रार करूनही कोणतीही दखल न घेण्यात आल्याने नागरिकांमध्ये तीव्र संताप व्यक्त केला जात आहे.
अपघातांचे प्रमाण वाढले, कर न भरण्याचा इशारा
सकाळी लहान मुले शाळेत जात असताना किंवा नागरिक कामावर जात असताना, रस्त्यावर साचलेल्या सांडपाण्यामुळे दुचाकी स्लिप होऊन पडण्याच्या घटना वारंवार घडत आहेत. प्रशासनाच्या या दुर्लक्षामुळे संतप्त झालेल्या बेला नगरवासीयांनी मनपा प्रशासनाचा निषेध केला आहे. तसेच, रस्त्याची तात्काळ दुरुस्ती न केल्यास महापालिकेचा कर (टॅक्स) भरणार नाही, असा इशारा रहिवाशांनी दिला आहे. स्थानिक नगरसेवकांनी प्रत्यक्ष जागेवर येऊन पाहणी करावी आणि दुरुस्तीचे काम तात्काळ सुरू करावे, अशी जोरदार मागणी होत आहे.
दलित वस्तीच्या निधीबाबत प्रश्न उपस्थित
वर्ष २०२५-२६ मधील दलित वस्ती विकास निधी बेला नगर भागासाठी वापरलाच गेला नसल्याची बाब समोर येत आहे. त्यामुळे महापालिका आयुक्तांनी या विषयात स्वतः लक्ष घालावे आणि २०२५-२६ या वर्षात बेला नगरमधील दलित वस्तीत कोणती विकासकामे झाली, याचा जाब नागरिकांनी विचारला आहे.
कचऱ्याची साठवणूक अन् डेंग्यूचा धोका
विशेष म्हणजे, बेला नगरमधील भावसार चौकापासून अवघ्या ५० मीटर अंतरावर असलेल्या मुख्य रस्त्याची साधी साफसफाईसुद्धा केली जात नाही. यामुळे हा परिसर अत्यंत गलिच्छ झाला आहे. कचरा उचलणारी घंटागाडी दररोज न येता दोन दिवसांतून एकदा येत असल्याने नागरिकांच्या घरात कचरा साचून राहत आहे. यामुळे परिसरात डेंग्यू आणि इतर संसर्गजन्य आजार पसरण्याची भीती निर्माण झाली आहे. घंटागाडी रोज सकाळी नियमित पाठवावी, अशी मागणी नागरिकांकडून केली जात आहे.
आमदारांना दिले निवेदन
या सर्व समस्यांबाबत उत्तर विधानसभा मतदारसंघाचे आमदार बालाजी कल्याणकर यांना बेला नगरवासीयांच्या वतीने निवेदन देऊन लक्ष वेधण्यात आले आहे. प्रशासनाने यावर लवकरात लवकर तोडगा न काढल्यास तीव्र आंदोलन छेडण्याचा इशारा स्थानिक रहिवाशांनी दिला आहे.
COMMENTS