भाजपाने माझ्या शब्दाचा विपर्यास केला, शिवप्रेमींच्या भावना दुखावल्याबद्दल हर्षवर्धन सपकाळ यांनी व्यक्त केली दिलगिरी

मुंबई: भारतीय जनता पक्षाने माझ्या विधानाचा खोडसाळपणे विपर्यास करून राज्यातील वातावरण बिघडवण्याचा प्रयत्न केला आहे. या अपप्रचारामुळे काही शि...

मुंबई: भारतीय जनता पक्षाने माझ्या विधानाचा खोडसाळपणे विपर्यास करून राज्यातील वातावरण बिघडवण्याचा प्रयत्न केला आहे. या अपप्रचारामुळे काही शिवप्रेमी बांधवांच्या भावना दुखावल्या गेल्या असतील, तर त्याबद्दल मी मन:पूर्वक खेद व्यक्त करतो, असे प्रतिपादन काँग्रेस प्रदेशाध्यक्ष हर्षवर्धन सपकाळ यांनी केले आहे.मुंबईतील टिळक भवन येथे काँग्रेस प्रदेश पदाधिकारी आणि जिल्हाध्यक्षांची संयुक्त बैठक पार पडली, त्यानंतर ते प्रसारमाध्यमांशी बोलत होते.

ठळक मुद्दे:

• तुलनेचा प्रश्नच नाही: छत्रपती शिवाजी महाराज हे माझे आदर्श आणि स्वाभिमान आहेत, त्यांच्याशी तुलना करण्याचा प्रश्नच उद्भवत नाही. भाजपाने जाणीवपूर्वक चुकीचा समज निर्माण करून दंगली घडवण्याचा प्रयत्न केला.

• भाजपाची पोलखोल सुरूच राहणार: भाजपाकडून मिळणाऱ्या धमक्यांना मी घाबरत नाही. अंगावर आले तर शिंगावर घेऊ, पण भाजपाचा खरा चेहरा जनतेसमोर उघड करतच राहू, असा इशारा सपकाळ यांनी दिला.

• मोदी सरकार दबावात (पृथ्वीराज चव्हाण): माजी मुख्यमंत्री पृथ्वीराज चव्हाण यांनी नमूद केले की, अमेरिका व्यापार करार आणि एपस्टिन फाईल्समुळे पंतप्रधान मोदी प्रचंड दबावात आहेत. सरकारने जनतेचे प्रश्न सोडून केवळ अपयश पदरी पाडून घेतले आहे.

• आगामी वर्षाचे नियोजन: प्रदेशाध्यक्ष म्हणून एक वर्ष पूर्ण झाल्यानिमित्त सपकाळ यांनी कामाचा अहवाल मांडला. आगामी वर्ष हे संघटन बांधणीचे असून शेतकरी प्रश्न, बेरोजगारी आणि महिला सुरक्षा या मुद्द्यांवर सरकारला जाब विचारण्यासाठी आंदोलने केली जातील.

जनतेला आवाहन

येत्या दोन दिवसांत शिवजयंती आहे. नागरिकांनी कोणत्याही अफवांना किंवा भाजपाच्या अपप्रचाराला बळी पडू नये आणि सामाजिक सलोखा राखावा, असे आवाहनही या बैठकीत करण्यात आले.

या बैठकीला बाळासाहेब थोरात, सतेज ऊर्फ बंटी पाटील, अतुल लोंढे आणि इतर वरिष्ठ काँग्रेस नेते उपस्थित होते.