दहावी-बारावी परीक्षा: नांदेड जिल्ह्यात भरारी पथके आणि केंद्रसंचालकांसाठी 'कडक' नियमावली जाहीर

  नांदेड: राज्यात फेब्रुवारी-मार्च २०२६ मध्ये होणाऱ्या इयत्ता १० वी आणि १२ वीच्या परीक्षा कॉपीमुक्त आणि सुरळीत वातावरणात पार पाडण्यासाठी ना...

 नांदेड: राज्यात फेब्रुवारी-मार्च २०२६ मध्ये होणाऱ्या इयत्ता १० वी आणि १२ वीच्या परीक्षा कॉपीमुक्त आणि सुरळीत वातावरणात पार पाडण्यासाठी नांदेड जिल्हा परिषदेचे माध्यमिक शिक्षण विभाग सतर्क झाले आहे. परीक्षा केंद्रांवरील पर्यवेक्षकीय कामात कोणतीही हयगय खपवून घेतली जाणार नाही, असा इशारा शिक्षणाधिकारी (मा.) यांनी एका अधिकृत ज्ञापनाद्वारे दिला आहे.

महत्त्वाच्या मार्गदर्शक सूचना:

• कडक तपासणी आणि सीसीटीव्ही: प्रत्येक परीक्षार्थीची बारकाईने तपासणी करूनच त्याला परीक्षा दालनात प्रवेश दिला जाईल. केंद्रसंचालकांनी स्वतः सर्व सीसीटीव्ही कॅमेरे सुरू असल्याची खात्री करणे अनिवार्य आहे.

• महिला परीक्षार्थींची सुरक्षा: मुलींची तपासणी ही बंद वर्गखोलीत केवळ महिला कर्मचाऱ्यांमार्फतच केली जावी, असे स्पष्ट निर्देश देण्यात आले आहेत.

• लाईव्ह मॉनिटरिंग (झूम वेबकास्ट): परीक्षेत पारदर्शकता राखण्यासाठी बैठे पथक प्रमुख 'झूम' लिंकद्वारे परीक्षेचे पूर्णवेळ शूटिंग करतील. हे शूटिंग 'HSC & SSC EXAM MONITORING 2026' या विशेष व्हॉट्सॲप ग्रुपवर मॉनिटर केले जाईल.

• मोबाईलवर बंदी: परीक्षा केंद्रात पर्यवेक्षकांना मोबाईल आणण्यास सक्त मनाई करण्यात आली आहे. तसेच, एका बेंचवर (ड्युएल डेस्क) केवळ एकाच विद्यार्थ्याला बसवण्याची जबाबदारी केंद्रसंचालकांवर असेल.

• अनाधिकृत व्यक्तींवर कारवाई: परीक्षा कालावधीत केंद्रावर शाळेचे कर्मचारी असले तरी, जर ते परीक्षेच्या कामात नसतील, तर त्यांना केंद्राबाहेर काढण्याचे आदेश दिले आहेत. आदेश न मानल्यास भारतीय न्याय संहितेनुसार कायदेशीर कारवाई केली जाईल.

यंत्रणेला सक्त ताकीद

शिक्षणाधिकारी यांनी स्पष्ट केले आहे की, जर केंद्रसंचालक, उपकेंद्रसंचालक, पर्यवेक्षक किंवा रनर यांनी आपल्या कर्तव्यात कसूर केली, तर त्यांच्यावर माध्यमिक व उच्च माध्यमिक प्रमाणपत्र परीक्षा नियमावलीनुसार प्रशासकीय आणि कायदेशीर कारवाई केली जाईल.या मोहिमेवर जिल्हाधिकारी, मुख्य कार्यकारी अधिकारी आणि पोलीस अधीक्षक हे विशेष लक्ष ठेवून आहेत.