नांदेड दि.
नांदेड एज्युकेशन सोसायटी संचालित पीपल्स कॉलेज, नांदेड येथील वाणिज्य विभागाचे सहाय्यक प्राध्यापक तथा अभ्यासक डॉ. विजू जाधव लिखित एम. कॉम. प्रथम वर्षासाठी उपयुक्त असलेल्या ‘आंतरराष्ट्रीय व्यवसाय पर्यावरण’ या पाठ्यपुस्तकाचे प्रकाशन महाविद्यालयात नुकतेच संपन्न झाले.
या पुस्तकाचे प्रकाशन महाविद्यालयातील प्र. प्राचार्य डॉ. एस. जी. भानेगावकार, उपप्राचार्य डॉ. अशोक सिद्धेवाड, विभाग प्रमुख डॉ. सी. के. हरणावळे, माजी उपप्राचार्य डॉ. बालाजी कोम्पलवार, डॉ. रेश्मा डोईफोडे, वकील वेदांत मयंकर, डॉ. विठ्ठल दहिफळे, डॉ. विशाल पतंगे व इतर मान्यवरांच्या उपस्थितीत पार पडले. विद्यार्थ्यांना आंतरराष्ट्रीय व्यवसाय, जागतिक बँक, बहुराष्ट्रीय कंपन्या, आंतरराष्ट्रीय वित्तीय संस्था, परकीय गुंतवणूक, विदेशी विनिमय व्यवस्थापन कायदा आदी संकल्पना सोप्या व अभ्यासक्रमाभिमुख पद्धतीने समजावून सांगणे हा या पुस्तकाचा मुख्य उद्देश आहे.
मराठवाड्यातील ग्रामीण व शहरी भागातील विद्यार्थ्यांना आंतरराष्ट्रीय व्यवसाय हा विषय अधिक सुलभपणे समजावा, या हेतूने डॉ. विजू जाधव यांनी मराठी भाषेत हे पुस्तक लिहिले असून ते विद्यापीठाच्या अभ्यासक्रमाशी सुसंगत आहे. पुस्तकाची मांडणी अद्ययावत असून यात मागील 20 वर्षांतील परीक्षेच्या प्रश्नपत्रिकासुद्धा आहेत. पुस्तकात विद्यार्थ्यांच्या परीक्षाभिमुख तयारीचा विशेष विचार करण्यात आला आहे.
उपस्थित मान्यवरांनी डॉ. जाधव यांच्या या शैक्षणिक योगदानाचे कौतुक करून पुस्तक विद्यार्थ्यांसाठी निश्चितच मार्गदर्शक ठरेल, असा विश्वास व्यक्त केला. या पुस्तकाच्या प्रकाशनामुळे पीपल्स कॉलेजच्या शैक्षणिक शिरपेचात आणखी एक मानाचा तुरा खोवला गेला आहे.
addComments
टिप्पणी पोस्ट करा