नांदेड ACB मध्ये खळबळ: १० लाखांची 'डीलिंग' आणि तपास सोडून अधिकारी दर्शनाला? शिक्षकाच्या प्रतिज्ञापत्राने पोलीस दलात भूकंप!

नांदेड कंधार (प्रतिनिधी): भ्रष्टाचार निर्मूलन करण्याची जबाबदारी असलेल्या 'लाचलुचपत प्रतिबंधक विभागा'चे (ACB) अधिकारीच आता संशयाच्या ...

नांदेड कंधार (प्रतिनिधी):
भ्रष्टाचार निर्मूलन करण्याची जबाबदारी असलेल्या 'लाचलुचपत प्रतिबंधक विभागा'चे (ACB) अधिकारीच आता संशयाच्या भोवऱ्यात सापडले आहेत. नांदेड जिल्ह्यातील कंधार न्यायालयात एका शिक्षकाने सादर केलेल्या धक्कादायक प्रतिज्ञापत्राने खळबळ उडवून दिली असून, चक्क ACB च्या डीवायएसपी (DYSP) आणि पोलीस निरीक्षकांवर गंभीर आरोप करण्यात आले आहेत. मुख्य आरोपीला वाचवण्यासाठी १० लाख रुपयांची तडजोड झाल्याचा दावा या तक्रारदारान केलाआहे.
काय आहे नेमकं प्रकरण?
लोहा तालुक्यातील जिल्हा परिषद प्राथमिक शाळेतील सहशिक्षक ज्ञानोबा नलबलवार यांनी त्यांच्या 'अर्जित रजेची' (Earned Leave) फाईल मंजूर करून घेण्यासाठी तक्रार दिली होती. या कामासाठी लाचेची मागणी करण्यात आली होती. या प्रकरणी दिगंबर शिंदे याला ताब्यात घेण्यात आले होते. मात्र, खऱ्या अर्थाने या प्रकरणाचा मुख्य सूत्रधार हा गटशिक्षणाधिकारी (B.E.O.) सतीश व्यवहारें असल्याचा दावा तक्रारदार शिक्षकाने केला आहे.
प्रतिज्ञापत्रातील खळबळजनक आरोप:
तक्रारदार ज्ञानोबा नलबलवार यांनी न्यायालयात सादर केलेल्या शपथपत्रात (Affidavit) अत्यंत गंभीर मुद्दे मांडले आहेत:
• १० लाखांची तडजोड: मुख्य आरोपी सतीश व्यवहारें यांना वाचवण्यासाठी आणि त्यांच्यावर गुन्हा दाखल न करण्यासाठी १० लाख रुपयांची तडजोड (सेटलेमेंट) झाल्याची कुजबुज शिक्षण विभागात सुरू असल्याचा आरोप शिक्षकाने केला आहे.
• तपास सोडून 'माहूर'ला दर्शन: पीसीआर (PCR) सुरू असताना तपासाचे गांभीर्य न राखता तपास अधिकारी पीआय प्रिती जाधव आणि डीवायएसपी प्रशांत पवार हे आरोपीला घेऊन माहूर येथे दर्शनासाठी फिरत होते, असा दावा करण्यात आला आहे. त्यांच्या टॉवर लोकेशनची तपासणी करण्याची मागणीही शिक्षकाने केली आहे.
• कोऱ्या कागदावर सह्या आणि धमकी: डीवायएसपी प्रशांत पवार यांनी तक्रारदारालाच एसीबी कार्यालयात बोलावून दमदाटी केली आणि जबरदस्तीने कोऱ्या कागदावर तसेच टाईप केलेल्या कागदावर सह्या घेतल्याचा आरोप करण्यात आला आहे. "मी तुझा निलंबनाचा रिपोर्ट पाठवू शकतो," अशी धमकीही त्यांना देण्यात आल्याचे नमूद केले आहे.
• आरोपीच्या मुलासोबत अधिकाऱ्यांच्या गप्पा: तक्रारदार जेव्हा एसीबी कार्यालयात गेले, तेव्हा पीआय प्रिती जाधव यांच्या केबिनमध्ये आरोपी दिगंबर शिंदे यांचा मुलगा हजर होता आणि अधिकारी त्याच्याशी चर्चा करत होते, असेही यात म्हटले आहे.
जीविताला धोका आणि न्यायाची मागणी
या संपूर्ण भ्रष्टाचार रॅकेटमध्ये मोठे अधिकारी सामील असून, आता आपल्या आणि आपल्या कुटुंबाच्या जीविताला धोका निर्माण झाला असल्याचे नलबलवार यांनी म्हटले आहे. "जर माझ्यासोबत काही बरे-वाईट घडले, तर त्याला संबंधित अधिकारी आणि आरोपी जबाबदार राहतील," असा इशारा त्यांनी दिला आहे. मुख्य आरोपीला अटक होईपर्यंत आणि तपास पारदर्शक होईपर्यंत आरोपी दिगंबर शिंदे याला जामीन देऊ नये, अशी विनंती त्यांनी न्यायालयाला केली आहे.
प्रशासनावर प्रश्नचिन्ह ?
एकीकडे भ्रष्टाचारमुक्त प्रशासनाच्या गप्पा मारल्या जात असताना, लाच घेणाऱ्यांना पकडणारे अधिकारीच जर 'डील' करत असतील, तर सामान्यांनी न्याय कुणाकडे मागायचा? असा संतप्त सवाल आता नांदेड जिल्ह्यात विचारला जात आहे. या प्रकरणातील मोबाईल लोकेशन आणि कॉल रेकॉर्ड्सची तपासणी केल्यास मोठे सत्य बाहेर येण्याची शक्यता आहे.
आता या प्रकरणावर न्यायालय काय निर्णय घेते आणि एसीबीचे वरिष्ठ अधिकारी आपल्याच विभागातील संशयीत अधिकाऱ्यांवर काय कारवाई करतात, याकडे सर्वांचे लक्ष लागले आहे.