नांदेड, दि. ०४ ऑक्टोबर २०२२ : मा. पंतप्रधान नरेंद्र मोदी यांच्या वाढदिवसाचे औचित्य साधून राष्ट्रनेता ते राष्ट्रपिता सेवा पंधरवड्यात महावितरणने विशेष कामगिरी बजावत केवळ १५ दिवसांत ५८ हजार ४५७ घरगुती ग्राहकांना नवीन वीजजोडण्या दिल्या आहेत. याशिवाय प्रलंबित असलेल्या ४४ हजार ६६९ ग्राहकांच्या वीजबिलावरील नावात बदल करण्याचे सर्व अर्ज निकाली काढत राज्य शासनाच्या या उपक्रमाचे महावितरणने १०० टक्के उद्दीष्ट साध्य केले आहे. यामध्ये नांदेड परिमंडळाच्या 2799 वीजजोडण्यांचा समावेश आहे. तर 608 वीजग्राहकांच्या बीलावरील नावात बदल करून देण्यात आलेला आहे.
दि. १७ सप्टेंबर ते ०२ ऑक्टोबर २०२२ या पंधरवड्यात ग्राहकांच्या प्रलंबित असलेल्या विशेषत: नवीन वीजजोडणी व ग्राहकांच्या वीजबिलावरील नावात बदल करणे या प्रकारच्या तक्रारींचे निवारण या पंधरवड्यात करण्यात यावे असे निर्देश महावितरणचे अध्यक्ष व व्यवस्थापकीय संचालक श्री. विजय सिंघल यांनी दिले होते. महावितरणने नवीन वीजजोडणीसोबतच ग्राहकांच्या वीजबिलावरीलनावात बदल करण्याची ऑनलाईन सुविधा उपलब्ध करून दिली आहे. नवीन ग्राहकांना वीजजोडणीसाठी रहिवाशी असल्याच्या एखाद्या दाखल्यासोबत सुरक्षा ठेव रक्कम भरावी लागते. तसेच वीजबिलावरील नावात बदल करण्यासाठी स्थानिक स्वराज्य संस्था किंवा सक्षम अधिकाऱ्यांचे प्रमाणपत्र आवश्यक आहे.
क्षेत्रीय स्तरावर दि. १० स्प्टेंबर २०२२ पर्यन्त पैशाचा भरणा करून प्रलंबित असलेल्या राज्यभरातील ५८ हजार ४५७ नवीन घरगुती वीजजोडणीच्या अर्जावर त्वरित कार्यवाही करून सेवा पंधरवाड्यात सर्व ग्राहकांना नवीन वीजजोडण्या देऊन १०० टक्के उद्दिष्ट साध्य केले आहे. नांदेड परिमंडळातील एकूण 2799 घरगुती ग्राहकांना वीजजोडण्या देण्यात आलेल्या आहेत. यामध्ये परभणी जिल्हयातील 915 वीजजोडण्या, हिंगोली जिल्हयामधील 378 तर नांदेड जिल्हयातील 1506 वीजजोडण्यांचा समावेश आहे. त्याचबरोबर प्रादेशिकनिहाय संख्या पुढीलप्रमाणे असून यात औरंगाबाद प्रादेशिक कार्यालयांतर्गत ९ हजार ५२८, कोंकण प्रादेशिक कार्यालयांतर्गत २५ हजार ६८५, नागपूर प्रादेशिक कार्यालयांतर्गत १४ हजार ९७५ आणि पुणे प्रादेशिक कार्यालयांतर्गत ९ हजार ६७३ नवीन घरगुती वीजजोडण्या देण्यात आल्या आहेत.
याशिवाय ग्राहकांच्या वीजबिलावरील नावात बदल करण्यासाठी ४४ हजार ६६९ ग्राहकांचे अर्ज वैध ठरविण्यात आले असून या सर्व ग्राहकांच्या नावात बदल करण्यात आले आहे. नांदेड परिमंडळातील एकूण 608 वीजग्राहकांच्या बीलावरील नावात बदल करून देण्यात आला आहे. यामध्ये परभणी जिल्हयातील 196, हिंगोली जिल्हयामधील 73 तर नांदेड जिल्हयातील 339 वीजग्राहकांचा समावेश आहे.
COMMENTS