NEET पेपर फुटी प्रकरण: दीड हजार पालकांचा काळा कारनामा उघड; पाल्यांच्या भवितव्याशी खेळणाऱ्या 'त्या' पालकांवर कडक कारवाईची मागणी!

0 0 संपादक धनराज भारती मंगळवार, मे १९, २०२६ Edit this post

विशेष प्रतिनिधी नांदेड: वैद्यकीय क्षेत्रातील मानाची आणि अत्यंत कठीण समजली जाणारी 'NEET' परीक्षा पुन्हा एकदा पेपर फुटीच्या कलंकाने डागाळली आहे. परंतु, यंदा या प्रकरणात एक धक्कादायक आणि अत्यंत संतापजनक वास्तव समोर आले आहे. ज्या पालकांवर आपल्या पाल्यांना सुसंस्कारित करण्याचे आणि प्रामाणिकपणाचे धडे देण्याची जबाबदारी असते, तेच दीड हजार (१,५००) हून अधिक पालक आपल्या मुलांसाठी शॉर्टकट शोधत या पेपर फुटीच्या रॅकेटमध्ये थेट सहभागी असल्याचे उघड झाले आहे.

लातूर येथील प्रा. कुलकर्णी यांच्या अटकेनंतर सीबीआयने (CBI) तपासाची चक्रे वेगाने फिरवत नांदेड येथील 'कदम' निवासस्थानावर छापा टाकला. या तपासात उघड झालेली माहिती संपूर्ण पालक वर्गाला आणि शिक्षण क्षेत्राला शरमेने मान खाली घालायला लावणारी आहे.
१० लाख मोजा आणि डॉक्टर व्हा? पालकांचा उफराटा न्याय!
सीबीआयच्या तपासात समोर आले आहे की, नांदेड जिल्ह्यातील शेकडो पालकांनी आपल्या मुलांना डॉक्टर बनवण्यासाठी तब्बल १० लाख रुपयांना NEET चा पेपर विकत घेतला. यासाठी मध्यस्थांना ५-५ लाख रुपये वाटण्यात आले. ज्या विद्यार्थ्यांनी रात्रीचा दिवस करून, प्रामाणिकपणे अभ्यास केला, त्यांच्या हक्कावर दरोडा टाकण्याचे पाप या दीड हजार पालकांनी संगनमताने केले आहे.
कारवाईच्या भीतीने 'पळपुटे' पालक; मुलांचे भविष्य अंधारात!
मंगळवारी (१९ मे) सीबीआयने कारवाईचा बडगा उगारताच, या घोटाळ्यात सामील असलेल्या पालकांचे धाबे दणाणले आहेत. सीबीआय आपल्या दारावर धडकणार या भीतीने अनेक पालकांनी स्वतःचे आणि मुलांचे मोबाईल डेटा डिलीट करून थेट देवदर्शन, पिकनिक किंवा नातेवाईकांकडे पळ काढला आहे.
चोरीच्या पेपरवर मिळवलेले डॉक्टरकीचे प्रमाणपत्र घेऊन ही मुले भविष्यात रुग्णांचे जीव वाचवणार की त्यांच्या जिवाशी खेळणार?
फसव्या आणि भ्रष्ट कोचिंग संचालकांवरही रोष!
या पेपर फुटी प्रकरणात आरसीसी (RCC) कोचिंग क्लासेसचे संचालक डॉ. शिवराज मोटेगावकर यांचे नाव समोर आल्यानंतर विद्यार्थ्यांमध्ये आणि पालकांमध्ये तीव्र संताप आहे. विद्यार्थी कृती समितीने २० मे रोजी धरणे आंदोलन पुकारले असून, केंद्रीय शिक्षणमंत्र्यांच्या राजीनाम्याची मागणी केली आहे. प्रामाणिक विद्यार्थ्यांच्या आत्महत्येला कारणीभूत ठरणाऱ्या अशा भ्रष्ट यंत्रणेला आणि त्यांना साथ देणाऱ्या पालकांना समाजानेही बहिष्कृत केले पाहिजे, असा सूर आता उमटत आहे.
...तर डॉक्टरकीची स्वप्ने पाहू नका!

पैशांच्या जोरावर पेपर खरेदी करून डॉक्टर बनण्याची स्वप्ने पाहणाऱ्या पालकांनी एक गोष्ट लक्षात ठेवावी— "सीबीआयची नजर आता तुमच्यावर आहे." अशा भ्रष्ट पालकांमुळे प्रामाणिक विद्यार्थ्यांचे खच्चीकरण होत आहे. या सर्व १,५०० पालकांची आणि त्यांच्या लाभाभार्थी मुलांची नावे जाहीर करून त्यांच्यावर कठोर कायदेशीर कारवाई झालीच पाहिजे, तरच या देशातील शिक्षण व्यवस्थेची अब्रू वाचू शकेल! छावा संघटना नांदेड