*ओडिशा जगरनॉट्सचा राजस्थान वॉरियर्सवर धमाकेदार विजय*
प्रतिक वाईकर व एम के गौतमला अष्टपैलू खेळाडूचा पुरस्कार
भुवनेश्वर, ३ जाने.: अल्टीमेट खो-खोच्या सीझन दोन मध्ये आज झालेल्या सामन्यात तेलुगू योद्धासने मुंबई खिलाडीसला धु-धु धुवत १८ गुणांनी सामना जिंकला. हा सामना कटक येथील जवाहरलाल नेहरू इनडोअर स्टेडियमवर झाला. या सामन्यात आज मुंबईला अतिशय वाईट पध्दतीने पराभवाला सामोरे जावे लागले. काल खेळलेला संघ तो हाच का? असा प्रश्न पडावा इतका वाईट खेळ मुंबईच्या खेळाडूंनी केला. तर दुसऱ्या सामन्यात ओडिशा जगरनॉट्सने राजस्थान वॉरियर्सवर ११ गुणांनी विजय साजरा केला. आजच्या सामन्यामध्ये प्रतिक वाईकर व एम के गौतमला अष्टपैलू खेळाडूचा पुरस्कार देऊन गौरवण्यात आले
आज झालेल्या एकोणिसाव्या सामन्यात तेलुगू योद्धासने मुंबई खिलाडीसचा ४०-२२ (मध्यंतर २१-७) असा १८ गुणांनी धुव्वा उडवला. चेन्नई क्विक गन्सला मध्यंतराला मिळालेल्या १४ गुणांची आघाडी निर्णायक ठरली. तेलुगू योद्धासने नाणेफेक जिंकून प्रथम आक्रमण घेतले व मुंबई खिलाडीसला संरक्षणासाठी आमंत्रित केले. सात मिनिटांच्या पहिल्या टर्नमध्ये मुंबई खिलाडीसच्या पहिल्या तुकडीतील प्रतिक देवारेला राहुल मंडलने सामन्याच्या सुरवातीलाच बाद केले. त्यानंतर एम. शिबिन सुध्दा दोन मिनिटाच्या आत मिलिंद चावरेकरने बाद केले तर ३.२० मिनिटापर्यंत हृषिकेश मुर्चावडेने संरक्षण करताना एक ड्रीम रणचा गुण सुध्दा मिळवला व त्याला प्रेम रणदिवेने बाद केले. त्यानंतर दुसरी तुकडी ५.२५ मिनीटापर्यंत टिकली त्यात पी. शिवा रेड्डी व गजानन शेंगाळ व एस श्रीजेश यांना बाद केले त्यात मिलिंद चावरेकरने दोन खेळाडू बाद केले तर गजाननला प्रतिक वाईकरने बाद केले. तर तिसऱ्या तुकडीतील सुभासिस संत्राला प्रसाद राडीयेने व सुनील पात्राला सौरभ आडवकरने बाद केले व तेलुगू योद्धासने १६ गुण मिळवले
दुसऱ्या टर्न मध्ये मुंबई खिलाडीसने पॉवर प्लेने सुरवात केली ज्यात दोन वजीर घेऊन खेळत होते. तेलुगू योद्धासच्या अवधूत पाटीलला (१.०२ मि. संरक्षण) आकाशीय सूर मारत हृषिकेश मुर्चावडेने बाद केले. प्रतिक वाईकरला (१.२६ मि. संरक्षण) गजानन शेंगाळने बाद केले मात्र त्या आधी प्रतिकने एक ड्रीम रणचा गुण मिळवला होता. त्यानंतर आदित्य गणपुलेने (२.२७ मि. संरक्षण) ४ ड्रीम रन्सचे (एक तुकडी तीन मिनिटांपेक्षा जास्त वेळ संरक्षण केल्यावर १ ड्रीम रण मिळतो व त्यानंतर प्रत्येक ३० सेकंदानंतर १-१ ड्रीम रण मिळतो) गुण मिळवत मुंबईच्या आक्रमकांचा घामटा काढला. त्यानंतर मुंबईला एकही गुण मिळवता आला नाही व मध्यंतराला तेलुगू योद्धासने मुंबई खिलाडीस २१-७ अशी १४ गुणांची दमदार आघाडी घेतली.
मध्यंतरानंतर तिसऱ्या टर्न मध्ये मुंबई खिलाडीसची पहिली तुकडी जवळजवळ २.३३ मिनिटात बाद झाली व त्यात रोकेसन सिंग व अविक सिंघाला अरुण गुणकीने बाद केले तर अभिषेक पाथरोडेला प्रसाद राडियेने स्तंभात बाद केले. दुसरी तुकडी साडेतीन मिनिटाच्या आत बाद झाली. त्यातील पी. शिवा रेड्डीला आकाशीय सूर मारत प्रतिक वाईकरने बाद केले. तर एस. श्रीजेशला आकाशीय सूर मारत सौरभ आडवकरने बाद करत ‘हम भि किसीसे कम नही’ या थाटात बाद केले. त्यानंतर गजानन शेंगाळला आदित्य गणपुलेला स्तंभात बाद करत मुंबईच्या अडचणी वाढवल्या. नंतरच्या तुकडीतील एम. शिबिनला आदित्य गणपुलेने सहज स्पर्शाने बाद केले तर प्रतिक देवारेला प्रतिक वाईकरने बाद करून तेलुगू योद्धासच्या गुणांत भर घातली तर शेवटच्या खेळाडूने नाबाद राहत एक ड्रीम रणचा गुण सुध्दा मिळवला व मुंबईला ३७-०८ असे ३० गुणांचे आव्हन दिले.
शेवटच्या व चौथ्या टर्न मध्ये तेलुगू योद्धासची पहिली तुकडीतील पहिला खेळाडू पावणे दोन मिनिटाने बाद झाला तो ध्रुव व त्याला बाद केले ते गजानन शेंगाळने व त्यानंतर आकाश तोगरेला सुभासिस संत्राने बाद केले. त्यानंतर राहुल मंडलने ३ ड्रीम रन्सचे गुण मिळवत संघाला अजून मजबूत स्थितीत आणून ठेवले व तो कोमलच्या सहज स्पर्शाने बाद झाला. त्यानंतरच्या तुकडीतील किरण वसावेला हृषिकेश मुर्चावडेने आकाशीय सूर मारत बाद केले, प्रसाद राडियेला अभिषेक पाथरोडेला स्तंभात बाद केले तर मिलिंद चावरेकरला एस. श्रीजेशने सुध्दा स्तंभात बाद केले व विजयभाई वेगड सेल्फ आउट झाले. व हा सामना तेलुगू योद्धासने ४०-२२ असा १८ गुणांनी जिंकला. या सामन्यात मिलिंद चावरेकर उत्कृष्ट आक्रमक, आदित्य गणपुलेला उत्कृष्ट संरक्षक तर प्रतिक वाईकरला अष्टपैलू खेळाडूचा पुरस्कार देऊन गौरवण्यात आले
आज झालेल्या दुसऱ्या व विसाव्या सामन्यात ओडिशा जगरनॉट्सने राजस्थान वॉरियर्सवर ३२-२१ (मध्यंतर १५-९) असा ११ गुणांनी विजय साजरा केला. ओडिशा जगरनॉट्सने नाणेफेक जिंकून प्रथम संरक्षण घेतले. या सामन्यातील पहिल्या टर्न मध्ये ओडिशा जगरनॉट्सच्या विशालला वृषभ वाघने आकाशीय सूर मारत बाद केले तर गौतम एम के ने ३ ड्रीम रन्सचे गुण मिळवत केलेले संरक्षण निलेश पाटीलने आकाशीय सूर मारत बाद करत थांबवले. त्यानंतर दिलीप खांडवीने ४ ड्रीम रन्सचे गुण मिळवत राजस्थान वॉरियर्सला कडवी लढत दिली व त्यानंतर दिलीप ५.२२ मि. नंतर बाद झाला तर दुसऱ्या तुकडीतील कोणीही बाद ण झाल्याने ओडिशा जगरनॉट्स सात ड्रीम रन्स सह ७-६ असा एक गुणाने आघाडीवर राहिला. पहील्यांदाच आक्रमण करताना राजस्थान वॉरियर्स पिछाडीवर पाहायला मिळाला.
दुसऱ्या टर्न मध्ये ओडिशा जगरनॉट्सच्या आक्रमकांनी पॉवर प्लेने सुरवात केली व राजस्थान वॉरियर्सच्या दीड मिनिटात पहिला खेळाडू विजय हजारेला दिपक साहूने आकाशीय सूर मारत बाद केले. वृषभ वाघने एक ड्रीम रन्सचा गुण मिळवले व त्याचवेळी सुशांत हजारेला दिपेश मोरेने बाद केले. तर पुन्हा एकदा वृषभ वाघने अजून दोन ड्रीम रन्स मिळवत जोरदार लढत दिली व एकूण तीन ड्रीम रन्स मिळवून दिले. व तो ४.२० मि. ला अक्षय मासाळ कडून बाद झाला. तर नंतरच्या तुकडीतील दिलराजसिंग सेंगरला पी. महेशाने आकाशीय सूर मारत बाद केले. नंतर मात्र राजस्थान वॉरियर्सने अधिक पडझड होऊ दिली नाही. त्यामुळे मध्यंतराला ओडिशा जगरनॉट्सने राजस्थान वॉरियर्सवर १५-९ अशी ६ गुणांची आघाडी घेतली. सुरवातीचा खेळ पाहिल्यावर ओडिशा जगरनॉट्स मोठी आघाडी मिळवतील असे वाटत असताना राजस्थान वॉरियर्सच्यां वृषभ वाघने उधळून लावली.
मध्यंतरानंतर तिसऱ्या टर्न मध्ये ओडिशा जगरनॉट्सच्या दिपक साहूला राजस्थानच्या डी. नंदन ने बाद केले तर अक्षय मासाळला विजय हजारेने स्तंभात बाद केले तर मनोज पाटीलला निलेश पाटीलने आकाशीय सूर मारत बाद केले. दुसऱ्या तुकडीतील दिपेश मोरेला निलेश पाटीलने पुन्हा एकदा आकाशीय सूर मारत बाद केले. बी. निखिलला प्रज्वल के एच ने बाद केले. तर ओंकार सोनवणेने ३ ड्रीम रन्स मिळवत राजस्थान वॉरियर्सच्या आक्रमणातील हवाच काढून टाकली व तो दिलराजसिंग सेंगरकडून स्तंभात बाद झाला व त्यानंतर ओडिशा जगरनॉट्सच्या संरक्षकांनी अधिक पडझड होऊ दिली नाही
शेवटच्या व चौथ्या टर्न मध्ये ओडिशा जगरनॉट्सला फक्त ४ गुणांचे विजयाचे आव्हन होते. राजस्थानची पहिली तुकडी २.२२ मिनिटात बाद झाली व ओडिशा जगरनॉट्सला ६ गुण मिळाले मात्र सतेज पाटील, निलेश पाटील व मरेप्पा तिघेही आकाशीय सूर मारून बाद केले गेले. तर दुसरी तुकडी चौथ्या टर्नच्या ४.४७ मिनिटात बाद झाली ती मजहर जमादार, रंजन शेट्टी व प्रज्वल के एच याच्या रूपाने. यातील दोन खेळाडू रोहन शिंगाडेने बाद केले तर एक खेळाडू बी. निखीलने. तिसऱ्या तुकडीतील सुशांत हजारेला दिलीप खांडवीने आकाशीय सूर मारत बाद केले. हा सामना ओडिशा जगरनॉट्सने ३२-२१ असा ११ गुणांनी जिकला. या सामन्यात निलेश पाटीलला उत्कृष्ट आक्रमक, दिलीप खांडवीला उत्कृष्ट संरक्षक तर एम के गौतमला अष्टपैलू खेळाडूचा पुरस्कार देऊन गौरवण्यात आले.
शुक्रवारी पहिला सामना तेलुगू योद्धास व चेन्नई क्विक गन्स यांच्यात तर दुसरा सामना गुजरात जायंट्स व राजस्थान वॉरियर्स यांच्यात रंगेल. खो खो फेडरेशन ऑफ इंडियाच्या सहकार्याने अमित बर्मन यांनी अल्टीमेट खो खो स्पर्धा सुरु केली असून हे सर्व अल्टीमेट खो-खो चे सामने दररोज सायंकाळी ७.३० पासून सोनी स्पोर्ट्स नेटवर्क चॅनेल व सोनी लीव अॅपवर थेट पहाता येतील.
COMMENTS