नांदेड पोलिसांची धडक कारवाई: उसाच्या शेतात सिनेमॅटिक पाठलाग करत २ सराईत गुन्हेगार जेरबंद; ८ गंभीर गुन्हे उघडकीस!

नांदेड: शहरात भररस्त्यात नागरिकांना अडवून मारहाण करणे, खंजिराचा धाक दाखवून लुटणे आणि महागड्या दुचाकी चोरणाऱ्या एका अट्टल टोळीचा नांदेड स्थान...

नांदेड: शहरात भररस्त्यात नागरिकांना अडवून मारहाण करणे, खंजिराचा धाक दाखवून लुटणे आणि महागड्या दुचाकी चोरणाऱ्या एका अट्टल टोळीचा नांदेड स्थानिक गुन्हे शाखेने पर्दाफाश केला आहे. पोलिसांनी बोंडार-हवेली रोडवरील उसाच्या शेतात अत्यंत शिताफीने सापळा रचून आणि पाठलाग करत दोन सराईत गुन्हेगारांच्या मुसक्या आवळल्या आहेत. या धाडसी कारवाईमुळे नांदेड शहर आणि परिसरातील एकूण ८ गंभीर गुन्हे उघडकीस आले आहेत.
कशी झाली कारवाई?
चैतन्यनगर आणि आसना ब्रिज परिसरात घडलेल्या जबरी चोरीच्या घटनांनंतर पोलीस अधीक्षक डॉ. नीलाभ रोहन व अपर पोलीस अधीक्षक संजय जाधव यांच्या मार्गदर्शनाखाली स्थानिक गुन्हे शाखेचे पथक गुन्हेगारांचा शोध घेत होते. यादरम्यान, गुप्त बातमीदाराकडून मिळालेल्या माहितीनुसार, चैतन्यनगर रोडवरील जबरी चोरीतील मुख्य संशयित आरोपी अमेरखान उर्फ एएमके आणि शेख रेहान हे चोरीच्या दुचाकी विकण्याच्या उद्देशाने बोंडार-हवेली रोड लगतच्या उसाच्या शेताजवळ थांबले होते.
पोलिस पथकाने तातडीने तिथे सापळा रचला. पोलिसांची चाहूल लागताच आरोपींनी पळून जाण्याचा प्रयत्न केला, परंतु सतर्क पोलीस पथकाने झडप घालून त्यांना जागीच ताब्यात घेतले.
तपासात उघड झालेली गुन्हेगारी बऱ्याच गोष्टींची पोलखोल:
पकडलेल्या आरोपींची कसून चौकशी केली असता, त्यांनी आपल्या इतर साथीदारांच्या मदतीने गुन्हे केल्याची कबुली दिली. या कारवाईत खालील गुन्हे उघडकीस आले आहेत:
चैतन्यनगर रोड जबरी चोरी: भररस्त्यात मोटारसायकलवरून येऊन एका व्यक्तीला मारहाण करत हातातील अंगठी लुटली होती.
आसना ब्रिज जबरी चोरी: ६ नोव्हेंबर रोजी किराणा दुकानदाराला दुचाकीने पाडून, खंजिराचा धाक दाखवून ५,२०० रुपयांची रोकड जबरीने हिसकावून नेली होती.
६ दुचाकी चोरीचे गुन्हे: आरोपींनी नांदेड शहर, बिलोली आणि ग्रामीण भागातून चोरलेल्या ६ वेगवेगळ्या महागड्या मोटारसायकली (जसे की रॉयल एनफिल्ड, येझदी रोडस्टर, बजाज पल्सर इ.) बोंडार-हवेली रोडवरील दाट झाडाझुडपात लपवून ठेवल्या होत्या.

पोलिसांनी एकूण ५ लाख ९५ हजार रुपये किंमतीचा मुद्देमाल आणि ६ चोरीच्या मोटारसायकली जप्त केल्या असून, दोन्ही आरोपींना पुढील कायदेशीर कारवाईसाठी भाग्यनगर पोलीस स्टेशनच्या स्वाधीन केले आहे
स्थानिक गुन्हे शाखेच्या या उत्कृष्ट व साहसी कामगिरीमुळे गुन्हेगारी वर्तुळात मोठी खळबळ उडाली असून नागरिकांमधून पोलिसांचे कौतुक होत आहे.