अलिबाग: अलिबागचे यशस्वी उद्योजक आणि निष्ठावंत समाजसेवक गजेंद्र दळी, ज्यांना प्रेमाने गजुभाऊ म्हणून ओळखले जात होते, त्यांचे २७ जुलै २०२५ रोजी वयाच्या ९१ व्या वर्षी निधन झाले. त्यांच्या निधनाने अलिबागच्या सामाजिक आणि व्यावसायिक क्षेत्रावर शोककळा पसरली आहे. ब्रह्मा, विष्णू, महेश सिनेप्लेक्सचे संस्थापक म्हणून त्यांची ओळख होतीच, पण त्याहूनही मोठे त्यांचे सामाजिक कार्य होते.
मूळचे रत्नागिरी जिल्ह्यातील लांजाजवळील घाटरोळ गावचे असलेले गजुभाऊंचे वडील तुकाराम दळी हे पानाचे दुकान चालवण्यासाठी मुंबईत स्थायिक झाले आणि नंतर अलिबागला आले. येथे त्यांनी पानाचे आणि विडी बनवण्याचे दुकान सुरू केले. १९ मे १९३४ रोजी अलिबागमध्ये जन्मलेल्या गजुभाऊंना शिक्षणापेक्षा व्यवसायात अधिक रुची होती. याच रुचीपोटी, १९७० साली त्यांनी महेश चित्रमंदिरची स्थापना केली. सुरुवातीला हे एक ओपन थिएटर होते, जे नंतर कायमस्वरूपी थिएटरमध्ये रूपांतरित झाले आणि आज ते ब्रह्मा, विष्णू, महेश सिनेप्लेक्स म्हणून अलिबागकरांच्या मनोरंजनाचे एक महत्त्वाचे केंद्र बनले आहे. गजुभाऊ केवळ उद्योजकच नव्हे, तर एक संवेदनशील समाजसेवक म्हणूनही त्यांची ओळख होती. त्यांनी आपल्या आयुष्यात ४२ देशांचा प्रवास केला होता. ते ज्येष्ठ नागरिक संघटनेत सक्रिय होते आणि लायन्स क्लबचे सदस्य होते. लायन्स हेल्थ फाउंडेशनला त्यांनी कॅट्रॅक्ट ऑपरेशनच्या अद्ययावत यंत्रणेसाठी १० लाख रुपयांची मदत केली होती. तसेच, १०४ आदिवासी जोडप्यांचे सामुदायिक विवाह लावून त्यांनी अनेकांच्या जीवनात आनंद आणला. उत्तम जीवनशैलीचे पुरस्कर्ते असलेले गजुभाऊ पूर्णपणे निर्व्यसनी होते.
मुंबई पोर्ट ट्रस्ट डॉक आणि जनरल एम्प्लॉईज युनियनचे अध्यक्ष व ज्येष्ठ कामगार नेते ॲड. एस. के. शेट्ये यांचे ते मेव्हणे होते. अलिबाग येथे युनियनचे कामगार शिक्षण शिबिर झाले तेव्हा, या शिबिराची सुंदर व्यवस्था गजुभाऊ यांनी केली होती. या शिबिराला डॉ. शांती पटेल उपस्थित होते. त्यांच्यामागे त्यांची पत्नी सुधा, दोन पुत्र सत्यजीत, विश्वजीत आणि सुना, नातवंडे असा मोठा परिवार आहे. गजुभाऊंच्या निधनाने अलिबागने एक दूरदृष्टीचा उद्योजक आणि समर्पित समाजसेवक गमावला आहे. त्यांचे कार्य आणि त्यांची सामाजिक बांधिलकी सदैव स्मरणात राहील. गजुभाऊंना मुंबई पोर्ट ट्रस्ट डॉक अँड जनरल एम्प्लॉईज युनियन व गोदी कामगारांतर्फे भावपूर्ण श्रद्धांजली!
आपला
मारुती विश्वासराव
प्रसिद्धीप्रमुख
मुंबई पोर्ट ट्रस्ट डॉकअँड जनरल एम्प्लॉईज युनियन
addComments
टिप्पणी पोस्ट करा