बी. रघूनाथ महाविद्यालयात रंगले कवी संमेलन मराठवाडा साहित्य परिषदेचा अक्षर भेट उपक्रम

फोटो ओळी परभणी : येथील मराठवाडा साहित्य परिषद व बी. रघुनाथ महाविद्यालयाच्या संयुक्त विद्यमाने आयोजित कवी संमेलनात कविता सादर करताना ज्येष्ठ ...

फोटो ओळी

परभणी : येथील मराठवाडा साहित्य परिषद व बी. रघुनाथ महाविद्यालयाच्या संयुक्त विद्यमाने आयोजित कवी संमेलनात कविता सादर करताना ज्येष्ठ कवी केशव बा. वसेकर मंचावर सरोज देशपांडे , मोहन कुलकर्णी, तुकाराम खिल्लारे, प्रा. भगवान काळे, सुरेश हिवाळे.

परभणी : येथील मराठवाडा साहित्य परिषद शाखा व बी. रघुनाथ महाविद्यालय यांच्या संयुक्त विद्यमाने ' अक्षर भेट '... एक मुक्त संवाद या उपक्रमांतर्गत बी.रघुनाथ यांच्या स्मृतिप्रीत्यर्थ आयोजित निमंत्रितांचे कवी संमेलन बी. रघुनाथ महाविद्यालयाच्या सभागृहात शनिवार ( दि.२३ ) रोजी कविंनी सादर केलेल्या बहारदार कवितांनी रंगले. कवी संमेलनाच्या सुरवातीला कवी बी. रघुनाथ यांच्या प्रतिमेस पुष्पहार अर्पण करून अभिवादन करण्यात आले. या प्रसंगी प्रसिद्ध कथाकार डॉ. आसाराम लोमटे , कवी संमेलनाचे अध्यक्ष ज्येष्ठ कवी केशव बा. वसेकर , मराठवाडा साहित्य परिषद शाखा परभणीच्या अध्यक्ष सरोज देशपांडे , उपाध्यक्ष बा.बा.कोटंबे , मोहन कुलकर्णी, तुकाराम खिल्लारे यांची उपस्थिती होती. कवी संमेलनाची सुरुवात बी. रघुनाथ यांच्या ' सांज ' या कवितेच्या वाचनाने झाली. कैलास सुरवसे यांनी आपल्या कवितेतून ' दुष्काळाच्या झळांच चित्रण ' मांडले. तर सुवर्णा मुळजकर यांनी ' स्वप्नी मी मला पाहिले मरताना ' ही कविता सादर करून श्रोत्यांना अंतर्मुख केले. सुनंदा देशमुख यांनी ' भाव वेडे शब्द माझे कविता तू जुळवून ये ' ही रचना सादर केली. रवी कात्नेश्वरकर यांनी ' आम्हाला न कळे रित युगाची ' या कवितेतून दोन पिढ्यांचे अंतर सांगितले. मारूती डोईफोडे यांनी ' शहरातल्या बंगल्यात हरवलेल्या पोराच्या आईची व्यथा ' आपल्या कवितेतून चित्रीत केली. शरद ठाकर यांनी ' आजी ' , डॉ. अशोक पाठक यांनी ' हेच तर पाहिजे होत त्यांना ', मधुरा उमरीकर यांनी ' आपापल्या मातीची जाणिव व्हावी', तर संजीवनी खोत यांनी ' शब्दांचे नाते 'ही कविता सादर केली. मोहन कुलकर्णी , तुकाराम खिल्लारे यांनी सादर केलेल्या कवितांनी रसिक भारावून गेले. महेश देशमुख यांनी ' मी एक स्वतंत्र विचारांचा कवी ' , माधव गव्हाणे यांनी ' खरंच राव इंडिया आहे ग्रेट ' , महेश कोरडे यांनी ' अवकाळी पाऊस ', ही कविता सादर करून श्रोत्यांना मंत्रमुग्ध केले. दिगंबर रोकडे, गझलकार अरविंद सगर, अमोल देशमुख , प्रा. हनुमान व्हरगुळे , अप्पा वडीकर, भानुदास धोत्रे , अनिल मुळजकर यांनी आपल्या कवितेतून रसिकांची मने जिंकली. कवी संमेलनाचे अध्यक्ष ज्येष्ठ कवी केशव बा. वसेकर यांच्या ' कवितेचे बांधकाम ' या कवितेने कवी संमेलनाचा समारोप झाला. प्रास्ताविक सरोज देशपांडे यांनी केले. सुरेश हिवाळे यांनी कवी संमेलनाचे बहारदार सुत्रसंचलन केले. तर आभार प्रदर्शन प्रा.भगवान काळे यांनी केले. त्र्यंबक वडसकर, माणिक पुरी , प्रा. हनुमान व्हरगुळे, मसाप च्या सर्व पदाधिकाऱ्यांनी कार्यक्रम यशस्वीतेसाठी पुढाकार घेतला.