किनवट बाजार समितीत शेतकऱ्यांचा एल्गार! सोयाबीनचे पैसे थकवल्याने गोदामाला ठोकले 'सील'

 किनवट: सोयाबीन विक्री करूनही त्याचे देयक (पेमेंट) महिनाभर उलटूनही न मिळाल्याने संतप्त झालेल्या शेतकऱ्यांनी मंगळवारी किनवट कृषी उत्पन्न बाजा...

 किनवट: सोयाबीन विक्री करूनही त्याचे देयक (पेमेंट) महिनाभर उलटूनही न मिळाल्याने संतप्त झालेल्या शेतकऱ्यांनी मंगळवारी किनवट कृषी उत्पन्न बाजार समितीमध्ये धाव घेऊन जोरदार निदर्शने केली. प्रशासनाने या प्रकरणाची गंभीर दखल घेत संबधित गोदामाला तत्काळ 'सील' ठोकले असून, अनियमिततेचा संशय व्यक्त करण्यात येत आहे.

नेमके प्रकरण काय?
मिळालेल्या माहितीनुसार, अनेक शेतकऱ्यांनी आपले सोयाबीन बाजार समितीत विक्री केले होते. मात्र, त्याचे पैसे वेळेवर न मिळाल्याने शेतकरी आर्थिक अडचणीत सापडले आहेत. हक्काचे पैसे मागण्यासाठी शेतकरी बाजार समिती कार्यालयात पोहोचले असता, तेथे जबाबदार अधिकारीच गायब असल्याचे दिसून आले. यामुळे शेतकऱ्यांच्या संतापाचा पारा अधिकच चढला.
प्रशासकीय कारवाई आणि पंचनामा
पणन विभागाचे अधिकारी चौकशीसाठी येणार असल्याची कुणकुण लागताच बाजार समितीत हालचालींना वेग आला. सहकार अधिकारी (श्रेणी-१) श्री. अय्यर यांनी घटनास्थळी भेट देऊन परिस्थितीची पाहणी केली. कागदपत्रे आणि गोदामातील साठा यांची प्राथमिक तपासणी केली असता त्यात तफावत आणि अनियमितता आढळली. त्यानंतर अधिक विलंब न लावता प्रशासनाने गोदामाला सील ठोकून पंचनामा केला.
महत्वाची नोंद: पंचनामा करताना बाजार समितीतील काही कर्मचारी कर्तव्यावर गैरहजर असल्याचेही आढळून आले असून, तशी नोंद अहवालात करण्यात आली आहे.
शेतकऱ्यांची मागणी
यावेळी शेतकरी प्रतिनिधी श्री. राठोड, आकाश प्रकाश आणि गजानन ठोसराडे यांच्यासह अनेक शेतकरी उपस्थित होते. "केवळ गोदाम सील करून आमचे समाधान होणार नाही. गोदामातील माल आणि व्यवहारांची सखोल चौकशी करून आमची थकबाकी व्याजासह तत्काळ मिळावी आणि दोषींवर कठोर फौजदारी कारवाई व्हावी," अशी मागणी शेतकऱ्यांनी लावून धरली आहे.

ब्युरो रिपोर्ट, ग्लोबल मराठवाडा