महावितरणचा दणका! नांदेडमध्ये वीज चोरांचे धाबे दणाणले; ५८ जणांवर गुन्हे दाखल

नांदेड: वीज चोरांविरुद्ध महावितरणने आता 'आरपार'ची लढाई सुरू केली आहे. नांदेड परिमंडळात अनधिकृतपणे वीज वापरणाऱ्यांविरुद्ध धडक मोहीम र...

नांदेड: वीज चोरांविरुद्ध महावितरणने आता 'आरपार'ची लढाई सुरू केली आहे. नांदेड परिमंडळात अनधिकृतपणे वीज वापरणाऱ्यांविरुद्ध धडक मोहीम राबवत, गेल्या आठवड्यात केवळ नांदेड शहरातच ५८ जणांविरुद्ध पोलीस ठाण्यात गुन्हे दाखल करण्यात आले आहेत. या कारवाईमुळे अनधिकृत आकडा टाकून वीज वापरणाऱ्यांचे धाबे दणाणले आहेत.

कारवाईचा मुख्य रोख कशावर?

महावितरणने थकबाकीदार ग्राहकांचा वीजपुरवठा खंडित केल्यानंतरही, अनेक ग्राहक परस्पर अनधिकृतपणे आकडे टाकून वीज वापरत असल्याचे समोर आले आहे. अशा प्रकरणांत आता केवळ दंड न आकारता थेट भारतीय विद्युत कायदा २००३ च्या कलम १३५ नुसार फौजदारी गुन्हे दाखल केले जात आहेत.

कुठे झाली कारवाई?
नांदेड शहरातील एमआयडीसी, ग्रामीण उप-विभाग, शहर उप-विभाग १ आणि २ अंतर्गत ही मोहीम राबवण्यात आली. यात प्रामुख्याने खालील भागांतील नागरिकांचा समावेश आहे:
गांधीनगर, वाजेगाव, शेळगाव (अर्धापूर)
हैदरबाग, गुलशन कॉलणी, महेबुबनगर
खुशीनगर, दत्तनगर आणि समतानगर
१२.९२ लाखांचा दंड: या ५८ जणांविरुद्ध गुन्हे दाखल करण्यासोबतच त्यांना चोरीच्या विजेपोटी तब्बल १२ लाख ९२ हजार रुपयांचे वीज बिल आणि दंड आकारण्यात आला आहे.
 नायगाव आणि भोकरमध्येही 'शॉक'
२१ मार्च २०२६ रोजी भोकर पोलीस ठाण्यातही मोठी कारवाई करण्यात आली. सोमठाणा, बरबडा, हिप्परगा आणि घुंगराळा (ता. नायगाव) येथील अनेक ग्राहकांनी वीज खंडित असतानाही चोरून वीज वापरल्याने त्यांच्यावर गुन्हे नोंदवण्यात आले आहेत.
 महावितरणचा इशारा
नांदेडसह परभणी आणि हिंगोली जिल्ह्यातही ही मोहीम अधिक तीव्र करण्यात आली आहे. "वीजबिल न भरणे आणि चोरी करणे महागात पडेल," असा स्पष्ट संदेश महावितरण प्रशासनाने दिला आहे. देगलूर, सेलू आणि हिंगोलीतही पथके तैनात करण्यात आली आहेत.