वसरणी येथील मंगळवार आठवडी बाजाराचे स्थलांतर : महापालिका व पोलीस विभागाची संयुक्त कारवाई

 

नांदेड,०९ डिसेंबर:-  नांदेड महानगनपालिका हद्दीत दर मंगळवारी वसरणी भागात भरणाऱ्या आठवडी बाजाराचे स्थलांतर करण्यात आले असुन आता हा आठवडी बाजार साईबाबा मंदिराकडे जाणाऱ्या गॅस गोडावुन कॉर्नर पासुन ते वसरणी रोड दुध डेअरी पर्यंत रस्त्याच्या बाजुस भरविला जाणार आहे. मंगळवार दि.०९.१२.२०२५ रोजी महापालिका व पोलीस प्रशासनाच्या संयुक्त पथकाने जंबो कारवाई करत वसरणी भागातील मुख्य रस्यावर भरविण्यात येणाऱ्या बाजारास मज्जाव करीत शेतकरी व व्यापाऱ्यांना पर्यायी जागेत स्थलांतरीत केले.

महापालिका हद्दीमध्ये मंगळवारचा आठवडी बाजार सद्यस्थितीत नविन कौठा मुख्य रस्ता श्री साईबाबा मंदिर कमानीपासुन ते महात्मा बसवेश्वर पुतळ्यापर्यंत जाणाऱ्या मार्गावर भरत असल्यामुळे वाहतुक व रहदारीस अडथळा निर्माण होत असे त्याचबरोबर रस्त्यावर ये-जा करणाऱ्यांना अडचण निर्माण होत असल्यामुळे सदरील बाजार इतरत्र ठिकाणी स्थलांतरीत करण्याचे महापालिका प्रशासनाच्या विचाराधीन होते. त्याअनुषंगाने आज वसरणी भागातील साईबाबा मंदिराकडे जाणाऱ्या गॅस गोडावुन कॉर्नर पासुन ते वसरणी रोड दुध डेअरी पर्यंत रस्त्याच्या बाजुस बाजार स्थलांतरणाची कार्यवाही पार पाडण्यात आली.

सदरील कारवाई जिल्हाधिकारी राहुल कर्डीले, पोलीस अधिक्षक अबिनाश कुमार, मनपा आयुक्त तथा प्रशासक डॉ. महेशकुमार डोईफोडे, व अतिरिक्त आयुक्त गिरीश कदम यांच्या मार्गदर्शनाखाली उपआयुक्त स.अजितपालसिंघ संधु यांच्या नेतृत्वात पालिकेच्या अतिक्रमण विभाग व पोलीस प्रशासनाच्या संयुक्त पथकाने ही कारवाई पार पाडली. या कारवाईत पोलीस निरीक्षक कांबळे, सहाय्यक पोलीस निरीक्षक हिंगोले त्यांचे पोलीस सहकारी, अतिक्रमण विभागाचे सहाय्यक आयुक्त रावण सोनसळे, क्षेत्रिय अधिकारी रमेश चवरे, गौतम कवडे, मिर्झा बेग, राजेश जाधव, निलावती डावरे यांच्यासह पालिकेचे १०० कर्मचारी तसेच ५० पोलीस कर्मचान्यांचा सहभाग होता.

चौकट

वसरणी भागातील नविन कौठा मुख्य रस्ता श्री साईबाबा मंदिर कमानीपासुन ते महात्मा बसवेश्वर पुतळ्यापर्यंत या मार्गावरुन जाताना येथील बाजारामुळे वाहतुकीची होणारी कोंडी तसेच भरधाव वाहनांमुळे होणारे अपघात टाळण्यासाठी या आठवडी बाजाराचे स्थलांतर करणे आवश्यक होते. सदरील आठवडी बाजार स्थलांतरीत केल्याने व्यापाऱ्यांसह नागरीकांकडुन समाधान व्यक्त केल्या जात आहे. तसेच यापुढे सुध्दा व्यापारी व शेतकरी बांधवांनी मंगळवारचा आठवडी बाजार मुख्य मार्गावर न भरवता पालिकेने उपलब्ध करुन दिलेल्या पर्यायी जागेत अर्थात साईबाबा मंदिराकडे जाणाऱ्या गॅस गोडावुन कॉर्नर पासुन ते वसरणी रोड दुध डेअरी पर्यंत रस्त्याच्या बाजुस भरविण्याचे आवाहन पालिका प्रशासनामार्फत करण्यात येत आहे.