देवणी धक्कादायक! ३५ लाखांच्या बदल्यात ६५ लाख दिले, तरी ३ हेक्टर शेतजमीन सावकाराने हडपून विकली!

देवणी खास प्रतिनिधी/ राजेंद्र हल्लाळे देवणी तालुक्यातील बोरोळ येथील शेतकरी अंगद नरहरी भोसले यांची तब्बल ३ हेक्टर २ आर बागायती शेतजमीन एका खा...

देवणी खास प्रतिनिधी/ राजेंद्र हल्लाळे
देवणी तालुक्यातील बोरोळ येथील शेतकरी अंगद नरहरी भोसले यांची तब्बल ३ हेक्टर २ आर बागायती शेतजमीन एका खाजगी सावकाराने कपटकारस्थान करून हडपल्याचा आणि परस्पर विकल्याचा गंभीर प्रकार उघडकीस आला आहे. दुप्पट रक्कम फेडूनही सावकाराची हाव न संपल्याने अखेर पीडित शेतकऱ्याने न्यायासाठी लातूर जिल्हा उपनिबंधकांकडे धाव घेतली आहे.
​📌 नक्की काय आहे प्रकरण?
​कोरोना काळातील अडचण: बोरोळ येथील मूळ रहिवासी (सध्या रा. पुणे) असणारे शेतकरी अंगद भोसले यांनी २०१९ मधील कोरोना संकटाच्या काळात कौटुंबिक अडचणीमुळे गावातील खाजगी सावकार दिपक रामचंद्र पाटील याच्याकडून ३५ लाख रुपयांचे कर्ज घेतले होते.
​तारणाचा बनाव: कर्ज देताना सावकाराने सुरक्षिततेचे आणि नाममात्र तारण म्हणून अंगद भोसले यांच्या गट क्र. १५२/५ मधील २ हेक्टर आणि १ हेक्टर २ आर शेतजमिनीचे तसेच घराचे 'नाममात्र खरेदीखत' करून घेतले होते.
​दुप्पट वसुलीनंतरही ब्लॅकमेलिंग: शेतकरी भोसले यांनी घेतलेल्या ३५ लाखांच्या मोबदल्यात व्याजासह ६५ लाख रुपये सावकाराला परत केले (याबाबतचे सर्व सबळ पुरावे त्यांच्याकडे उपलब्ध आहेत).
​१ कोटी ९० लाखांची मागणी: मुद्दल व व्याज मिळून दुप्पट रक्कम हातात पडूनही सावकार दिपक पाटील याने चुकीचा हिशोब मांडत "आणखी १ कोटी ९० लाख रुपये द्या, नाहीतर जमीन परत मिळणार नाही!" अशी धमकी देऊन जमीन हडप केली.
​ परस्पर जमीन विक्री आणि उपोषणाचा इशारा
​सावकार दिपक पाटील याने नाममात्र खरेदीखताचा गैरफायदा घेत फेरफार ओढून ही जमीन परस्पर शादाब मिर्झा आणि शोएब मिर्झा या दोन भावांच्या नावावर विकून टाकली.
​"माझे बेकायदेशीर झालेले खरेदीखत रद्द करून माझी जमीन मला त्वरित परत मिळावी, अन्यथा जिल्हा उपनिबंधक कार्यालयासमोर आमरण उपोषण करण्याशिवाय माझ्याकडे कोणताही पर्याय उरलेला नाही!"
— अंगद नरहरी भोसले (पीडित शेतकरी)
​ उपनिबंधकांची धडक कारवाई: सावकारासह खरेदीदारांना नोटीस!
​या प्रकरणाचे गांभीर्य ओळखून लातूर जिल्हा उपनिबंधकांनी तात्काळ दखल घेतली असून:
​खाजगी सावकार दिपक पाटील आणि खरेदीदार शोएब मिर्झा, शादाब मिर्झा यांना कारणे दाखवा नोटीस बजावली आहे.
​येत्या २९ सप्टेंबर रोजी सर्वांना सुनावणीसाठी प्रत्यक्ष हजर राहण्याचे आदेश देण्यात आले आहेत.
​सुनावणीदरम्यान कोणताही पक्ष गैरहजर राहिल्यास एकतर्फी निकाल दिला जाईल, असा कडक इशाराही नोटीसमध्ये देण्यात आला आहे.
दीपक पाटील शोयब मिर्झा शहादा मिर्झा यांना दैनिक ग्लोबल मराठवाड्याच्या वतीने त्यांची प्रतिक्रिया जाणून घेण्यासाठी संपर्क करण्यात आला असता त्यांचा संपर्क होऊ शकला नाही